ཆོས་ལུགས་ཁ་འདོན་ཙམ་བྱེད་པའི་དད་ཞེན་མཐོན་པོ་ཅན།།
བསྟན་པ་ཆོ་ག་ལ་འཕྲུལ་བའི་རྨོངས་བའི་མགོ་བོ་ཅན།།
ཐུབ་པའི་གཞུང་ལུགས་ལ་བལྟ་བའི་ཚུལ་དེ་ནོར་བ་རེད།།
སྟོན་པའི་ངོ་གདོང་ལ་གཞལ་བའི་ཚད་དེ་འཆུག་པ་རེད།།
མི་ཆོས་ལོག་སྤྱོད་དུ་བསམ་པའི་སྐྱ་བོ་ཆོས་སྨྲ་བ།།
འཁོར་བ་སྡུག་བསྔལ་ལ་སྒོམ་པའི་རང་གཟུགས་ཡ་མ་བརླ།།
འཇིག་རྟེན་ལྟ་ཚུལ་གྱི་འདུ་ཤེས་རྩ་ནས་ནོར་བ་རེད།།
མི་གཤིས་བསམ་བློའི་རྒྱ་ཁྱོན་དེ་ཧ་ཅང་ཆུང་བ་རེད།།
ལྷ་ཆོས་རྙིང་བ་རུ་འཛིན་པའི་བསམ་བློ་དག་མོ་ཅན།།
ཆོས་ལུགས་དོར་བྱ་རུ་སྒྲུབ་པའི་སུན་འབྱིན་མཁན་པོ་གཅིག།
ཀུན་ཕན་སེམས་ཁམས་ཀྱི་འདུ་ཤེས་གཏན་ནས་མེད་པ་རེད།།
དཔྱོད་ཤེས་བློ་མིག་གིས་སྙིང་སྟོབས་རྩ་ནས་ཞ་བ་རེད།།
ཆབ་སྲིད་འགལ་འདུ་ལ་རྨོངས་བའི་འཐབ་རྩོད་མཁན་པོ་གཅིག།
རང་བཙན་སེམས་ཤུགས་ལ་བཅོལ་བའི་སྒྱིད་ལུགས་ཅན་དེ་གཉིས།།
མི་རིགས་འཐབ་རྩོད་ཀྱི་ཁ་ཕྱོགས་རྩ་ནས་ནོར་བ་རེད།།
རིགས་ཞེན་འདུ་ཤེས་ཀྱི་ལ་རྒྱ་དངོས་ནས་རྫུན་མ་རེད།།
མཐོན་པོའི་ངོ་སོ་ཙམ་སྲུང་བའི་ཆུ་ཡི་རྔ་མ་ཅན།།
གཉོམ་ཆུང་དགྲ་བོ་ལྟར་བཀུར་བའི་ལྡང་ཟུག་མཁན་པོ་དེས།།
མི་གཤིས་ཀུན་སྤྱོད་ཀྱི་འཁྱེར་སོ་གཏན་ནས་འཆུག་པ་རེད།།
རང་གི་མི་གཞིའི་རིན་ཐང་དེ་རྩ་ནས་བརླགས་པ་རེད།།
